ပရီးမီးယားလိဂ် ၂၇ ရဲ့ နောက်ထပ် ပွဲစဉ် တစ်ပွဲ မှာတော့ လစ်ဗာပူးလ်က နော့တင်ဟမ်ဖောရက်စ်ကို ပွဲပြီးခါနီး နာကျင်အချိန်ပို နောက်ဆုံး မိနစ် သွင်းဂိုးနဲ့ အနိုင်ရသွားခဲ့ပါတယ်။ ဒါကြောင့် နည်းပြ ဗစ်တာ ပါရဲရား အတွက်တော့ နော့တင်ဟမ်ဖောရက်စ်နဲ့ သူ့ရဲ့ ပရီးမီးယားလိဂ် အဖွင့် ပွဲစဉ်ဟာ ရင်နာစရာ ကောင်းတဲ့ ရလဒ်နဲ့ အဆုံးသတ်ခဲ့ရတယ်လို့ပဲ ဆိုရမှာပါ။
ဒီပွဲမှာ လစ်ဗာပူးလ် အတွက် အဖိုးတန် အနိုင်ဂိုးကို ပွဲချိန် ၉၇ မိနစ် အရောက်မှ အလက်ဆစ် မက်အယ်လစ္စတာက သွင်းယူပေးခဲ့တာ ဖြစ်ပါတယ်။ ဒီနိုင်ပွဲကြောင့် အာနေး ဆလော့တ်ရဲ့ လစ်ဗာပူးလ်က အဆင့် ၄ နေရာက ချဲလ်ဆီးနဲ့ ရမှတ်တူ သွားခဲ့ပြီး ချန်ပီယံလိဂ် ဝင်ခွင့် အတွက် မျှော်လင့်ချက်တွေ အပြည့်အဝ ရှင်သန်ခဲ့ရပါတယ်။
ပွဲစဉ်အကျဉ်း
တန်းဆင်းဇုန်နဲ့ ၅ မှတ် အကွာအထိ ရုန်းထွက်နိုင်ဖို့ ကြိုးစားခဲ့တဲ့ နော့တင်ဟမ်ဖောရက်စ်ဟာ ပထမပိုင်းမှာ ကစားပုံ ပိုကောင်းခဲ့ပါတယ်။ ဟက်ဒ်ဆန် အိုဒွိုင်းက ဆလို့ဇ်ဆလိုင်းကို ကျော်ဖြတ်ပြီး အပိုင် ကန်သွင်းခဲ့ပေမယ့် ဂိုးသမား အလီဆွန် ဘက်ကာ ကာကွယ်သွားနိုင်ခဲ့သလို၊ အဲလီယော့တ် အန်ဒါဆန်ရဲ့ ကန်ချက် ကလည်း ဂိုးပေါက်နဲ့ လွဲချော်ခဲ့လို့ လစ်ဗာပူးလ်တို့ ကံကောင်းခဲ့ရတာ ဖြစ်ပါတယ်။
ဒုတိယပိုင်း မှာတော့ လစ်ဗာပူးလ်တို့ ကစားပုံ ပြန်ကောင်းလာခဲ့ပြီး ပြိုင်ဘက်ရဲ့ ခံစစ်ကို အချိတ်အဆက်မိမိနဲ့ ထိုးဖောက်လာနိုင်ခဲ့ပါတယ်။ ပွဲမစခင် သွေးပူလေ့ကျင့်ခန်း လုပ်နေစဉ် ဒဏ်ရာ ရသွားတဲ့ ဖလော်ရီယန် ဗစ်ဇ် အစား ဝင်ကစားခဲ့တဲ့ ကာတစ် ဂျုန်းစ်ရဲ့ အနီးကပ် ကန်ချက်ကို ဖောရက်စ် ဂိုးသမား စတီဖန် အော်တီဂါ လက်စွမ်းပြ ကာကွယ်ခဲ့ပါတယ်။ အဲဒီနောက် ပွဲပြီးခါနီး မှာတော့ လစ်ဗာပူးလ်တို့ ဖိအားပေးမှုတွေ ပိုလုပ်လာခဲ့ပြီး ဟူဂို အစ်ကီတီကေးရဲ့ ခေါင်းတိုက်ချက်ကို အော်တီဂါ ပုတ်ထုတ်လိုက်ရာ ကနေ ဘောလုံးဟာ အိုလာ အိုင်နာရဲ့ ဖျတ်ထုတ်မှုနဲ့ အတူ မက် အယ်လစ္စတာရဲ့ တံတောင်ဆစ်ကို ထိပြီး ဂိုးထဲဝင်သွားခဲ့ပါတယ်။ ဒါပေမယ့် အဲဒီဂိုး ကိုတော့ VAR က လက်ထိဘော အဖြစ် သတ်မှတ်ပြီး ပယ်ဖျက်ခဲ့ပါတယ်။
ဒါပေမယ့် မက် အယ်လစ္စတာရဲ့ နောက်ထပ် တစ်ကြိမ် ကြိုးပမ်းမှု မှာတော့ လစ်ဗာပူးလ်တို့ လိုအပ်နေတဲ့ ဂိုးရခဲ့ပါတယ်။ ဗာဂျယ် ဗန်ဒိုက်ခ်ရဲ့ ခေါင်းတိုက်ချက်ကို ဂိုးသမား ပုတ်ထုတ်ရာ ကနေ ထွက်လာတဲ့ ဘောလုံးကို အာဂျင်တီးနားသားက အနီးကပ် ပိတ်သွင်းပြီး အနိုင်ဂိုး ရယူပေးခဲ့တာ ဖြစ်ပါတယ်။ ဒီဂိုး ကိုတော့ VAR က လူကျွံခြင်း ရှိမရှိ စစ်ဆေးခဲ့ပေမယ့် ဂိုး အဖြစ် အတည်ပြုပေးခဲ့ပါတယ်။
ပွဲပြီးအချက်အလက်နဲ့ မှတ်တမ်းများ
ပြီးခဲ့တဲ့ ရာသီကတည်းက လစ်ဗာပူးလ်ဟာ ခက်ခဲနေတဲ့ ပွဲစဉ်တွေမှာ အနိုင်ရမယ့် နည်းလမ်းကို ရှာဖွေနိုင်လေ့ ရှိပြီး အခုလည်း ဖောရက်စ်ကွင်းမှာ အဲဒီစွမ်းဆောင်ရည်ကို ထပ်မံ ပြသနိုင်ခဲ့တာ ဖြစ်ပါတယ်။ ပွဲချိန် ၉၆ မိနစ် ၁၀ စက္ကန့်မှာ သွင်းယူခဲ့တဲ့ ဒီဂိုးဟာ လစ်ဗာပူးလ်ရဲ့ ပရီးမီးယားလိဂ် သမိုင်းတလျှောက် (၂၀၀၆-၂၀၀၇ ခုနှစ် ကနေ စပြီး) စတုတ္ထမြောက် နောက်အကျဆုံး အနိုင်ဂိုး ဖြစ်ခဲ့ပါတယ်။
လစ်ဗာပူးလ်ဟာ ပရီးမီးယားလိဂ်မှာ ပွဲချိန် မိနစ် ၉၀ (ဒါမှမဟုတ်) နာကျင်အချိန်ပိုမှ အနိုင်ဂိုး ရယူနိုင်ခဲ့တာ ၄၈ ကြိမ် ရှိပြီ ဖြစ်ပြီး ဒါဟာ တခြား ကလပ်တွေထက် အနည်းဆုံး ၁၂ ကြိမ် ပိုများနေပါတယ်။
မက် အယ်လစ္စတာဟာ ပရီးမီးယားလိဂ် ပွဲစဉ် ၂၇ ပွဲ ဆက်တိုက် ဂိုးပေါက် ပျောက်ဆုံးနေမှုကို ဒီပွဲမှာ အဆုံးသတ်နိုင်ခဲ့ပါတယ်။ သူဟာ ဒီပွဲမှာ ဂိုးပေါက်တည့်အောင် တစ်ကြိမ်သာ ကန်သွင်းနိုင်ခဲ့ပေမယ့် အဲဒီကန်ချက် ကပဲ အသင်း အတွက် နိုင်ပွဲရစေခဲ့တာ ဖြစ်ပါတယ်။
ဒီနိုင်ပွဲကြောင့် လစ်ဗာပူးလ်ဟာ ရမှတ် ၄၅ မှတ်နဲ့ အဆင့် ၄ နေရာက ချဲလ်ဆီးနဲ့ ရမှတ်တူသွားခဲ့ပြီ ဖြစ်ပါတယ်။ လာမယ့် ရာသီ ချန်ပီယံလိဂ် ဝင်ခွင့် အတွက် ပရီးမီးယားလိဂ် ကနေ ခွဲတမ်း ၅ သင်း ရရှိမှာ ဖြစ်တာကြောင့် အဆင့် ၄ နဲ့ ၅ နေရာ အတွက် အဓိက လုနေရတဲ့ ၃ သင်း ရှိနေပါတယ်။ လက်ရှိမှာ ချဲလ်ဆီး၊ ယူနိုက်တက်နဲ့ လစ်ဗာပူးလ် တို့ ၃ သင်းဟာ ၄၅ မှတ်စီ တူညီနေပြီး ဂိုးကွာခြားချက်ကြောင့်သာ အထက်အောက် ရပ်တည်နေတာ ဖြစ်ပါတယ်။ တစ်ခု ရှိတာက ဒီကနေ့ ညမှာ မန်ချက်စတာယူနိုက်တက်သာ အဲဗာတန်ကို အနိုင်ရခဲ့မယ် ဆိုရင်တော့ အဆင့် ၄ နေရာကို တက်လှမ်းနိုင်မှာ ဖြစ်သလို ချဲလ်ဆီးနဲ့ လစ်ဗာပူးလ် ကိုလည်း ၃ မှတ်စီ ဖြတ်နိုင်မှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
