ဒီရာသီ ပရီးမီးယားလိဂ် ချန်ပီယံဆုကို ဆွတ်ခူးထားနိုင်ခဲ့ပြီး ဖြစ်တဲ့ အာဆင်နယ်က အခုတပတ် အတွင်း သူတို့ရဲ့ သမိုင်းတစ်လျှောက် ပထမဆုံးအကြိမ် အဖြစ် ဥရောပ ချန်ပီယံလိဂ် ချန်ပီယံ ဖြစ်လာဖို့ မျှော်လင့်နေပါတယ်။ ဒါကြောင့် ပရီးမီးယားလိဂ် ချန်ပီယံဆုကို နောက်ဆုံးမှာ အောင်မြင်စွာ သိမ်းပိုက်နိုင်ခဲ့ခြင်းက ချန်ပီယံလိဂ် ဗိုလ်လုပွဲ မတိုင်ခင် အာဆင်နယ် အတွက် အဓိက ယုံကြည်မှု မြှင့်တင်ရေး အတွက် အထောက်အကူ တစ်ခု ဖြစ်စေခဲ့ကြောင်း ဒါးဗစ် ရာယာက ယုံကြည်နေပါတယ်။
ပြီးခဲ့တဲ့ တပတ်ကမှ ၂၂ နှစ်ကြာ ဝေးကွာနေတဲ့ အင်္ဂလန် အမှတ်ပေး ချန်ပီယံဆုကို (၁၄) ကြိမ်မြောက် အဖြစ် အရယူကာ စောင့်ဆိုင်းရမှုကို အဆုံးသတ်နိုင်ခဲ့တဲ့ ဂန်းနား တို့ဟာ လာမယ့် စနေနေ့ ဘူဒါပက်စ်မြို့မှာ ကျင်းပမယ့် ဥရောပ ဘောလုံးလောကရဲ့ အကြီးကျယ်ဆုံး ပွဲစဉ် အဖြစ် ပီအက်စ်ဂျီနဲ့ ရင်ဆိုင်ရမှာ ဖြစ်ပါတယ်။
အကယ်၍ အာဆင်နယ်သာ ဗိုလ်စွဲခဲ့ရင်တော့ ချန်ပီယံလိဂ် သို့မဟုတ် ဥရောပဖလားကို ဆွတ်ခူးနိုင်တဲ့ ၂၅ သင်းမြောက် မတူညီတဲ့ ကလပ် အသင်း ဖြစ်လာတော့မှာပါ။ ဒါ့အပြင် အာဆင်နယ်က တစ်ရာသီတည်းမှာပဲ အင်္ဂလန် ချန်ပီယံဆုနဲ့ ဥရောပချန်ပီယံဆုတို့ကို တစ်ပြိုင်နက်တည်း သိမ်းပိုက်နိုင်တဲ့ စတုတ္ထမြောက် အသင်း ဖြစ်လာမှာလည်း ဖြစ်ပါတယ်။ ဒီလို စွမ်းဆောင်ရည်မျိုးကို ၁၉၇၆-၇၇ နဲ့ ၁၉၈၃-၈၄ ရာသီတွေမှာ လစ်ဗာပူးလ်၊ ၁၉၉၈-၉၉ နှင့် ၂၀၀၇-၀၈ ရာသီတွေမှာ မန်ချက်စတာယူနိုက်တက်၊ ၂၀၂၂-၂၃ ရာသီမှာ မန်ချက်စတာစီးတီး တို့က အသီးသီး စွမ်းဆောင်ခဲ့ဖူးပါတယ်။
၃ ရာသီ ဆက်တိုက် ဒုတိယနေရာနဲ့သာ ကျေနပ်ခဲ့ရပြီးနောက် အခုအခါ ပြည်တွင်း ပြိုင်ပွဲမှာ မန်စီးတီးကို ကျော်ဖြတ်ကာ ချန်ပီယံ ဖြစ်ခဲ့တာကြောင့် မီခဲလ် အာတေးတားရဲ့ အသင်းသားတွေက ကိုယ့်ကိုယ်ကိုယ် ယုံကြည်မှု အဆင့် တစ်ခုကို ရောက်ရှိနေပြီလို့ ရာယာက ခံစားနေရပါတယ်။
“ဒါဟာ မဖြစ်မနေ လိုအပ်တဲ့အရာပါ။ ကျွန်တော် ဒီအသင်းကို ရောက်ကတည်းက၊ ဒါမှမဟုတ် မရောက်ခင် ကတည်းက ဒါဟာ အသင်းရဲ့ ပန်းတိုင်ဖြစ်ခဲ့တာပါ” လို့ အာဆင်နယ်ရဲ့ ပရီးမီးယားလိဂ် အောင်မြင်မှုနဲ့ ပတ်သက်ပြီး စပိန် သတင်းစာ Diario AS ကို ရာယာက ပြောကြားခဲ့ပါတယ်။
“ဒီကလပ် အသင်း တည်ရှိနေတာဟာ အမြင့်ဆုံး ဂုဏ်ထူးဆောင် ဆုဖလားတွေ အတွက် အပြိုင်အဆိုင် ကြိုးပမ်းဖို့ ဖြစ်ပြီး ပရီးမီးယားလိဂ် ဟာလည်း အဲဒီအထဲက တစ်ခု ဖြစ်ပါတယ်။ ကျွန်တော်တို့ ဒါကို အောင်မြင်အောင် လုပ်ဆောင်နိုင်ခဲ့ပြီ ဖြစ်လို့ အခု ချန်ပီယံလိဂ် ဗိုလ်လုပွဲဆီ တက်လှမ်းမယ့် အချိန်မှာ ဒါက ကျွန်တော် တို့ကို ကြီးမားတဲ့ ခွန်အား တစ်ခု ဖြစ်စေမှာပါ” လို့ ရာယာက ဆိုပါတယ်။
ကျောက်ဆောင်လို ခိုင်မာတဲ့ ခံစစ်နဲ့ ရာယာရဲ့ မှတ်တမ်းကောင်းများ
အာဆင်နယ်တို့ ချန်ပီယံလိဂ် ဗိုလ်လုပွဲအထိ တက်လှမ်းနိုင်ခဲ့ခြင်းဟာ ကျောက်ဆောင်လိုမျိုး ခိုင်မာတဲ့ ခံစစ် စွမ်းဆောင်ရည်ပေါ်မှာ အခြေခံခဲ့ခြင်း ဖြစ်ပါတယ်။ ရာယာက ဒီရာသီ ချန်ပီယံလိဂ် ပြိုင်ပွဲမှာ ပွဲစဉ် ၉ ပွဲ အထိ ဂိုးမပေးရအောင် (Clean sheet) ရအောင် စွမ်းဆောင်နိုင်ခဲ့ပါတယ်။ ချန်ပီယံလိဂ် ပြိုင်ပွဲ သမိုင်းတစ်လျှောက် ဘယ်ဂိုးသမားကမှ တစ်ရာသီတည်းမှာ ၁၀ ပွဲ အထိ Clean sheet ရယူနိုင်ခဲ့ခြင်း မရှိသေးပါဘူး။
“ကိုယ်တိုင်လည်း တကယ့်ကို ကောင်းမွန်တဲ့ အခြေအနေ တစ်ခုမှာ ရှိနေတယ်လို့ ထင်ပါတယ်။ ဒါဟာ ကျွန်တော့် တစ်ဦးတည်းကြောင့် မဟုတ်ပါဘူး။ ကျွန်တော်တို့ ရရှိခဲ့တဲ့ Clean sheet တွေဟာ အသင်း တစ်သင်းလုံးရဲ့ စွမ်းဆောင်ရည်ကြောင့်လို့ ထင်ပါတယ်။ အသင်းလိုက် လုပ်ဆောင်ခဲ့တဲ့ အလုပ်တွေ အပေါ်မှာ လုံးဝ ကျေနပ်အားရပြီး ယုံကြည်မှုလည်း ရှိပါတယ်။ ပြိုင်ဘက်တွေကို အခွင့်အရေး လုံးဝမပေးခဲ့တဲ့ ပွဲစဉ်တွေ အများကြီး ရှိခဲ့ပြီး အဲဒါကပဲ ကျွန်တော် တို့ကို အဓိကအကျဆုံး ဖြစ်တဲ့ ချန်ပီယံဆုကို ဆွတ်ခူးနိုင်အောင် ကူညီပေးခဲ့တာပါ” လို့ ရာယာက ထပ်လောင်း ပြောကြားခဲ့ပါတယ်။
ဆရာဟောင်း လူးဝစ် အန်နရီကေးနဲ့ ပြန်လည် ဆုံတွေ့ခြင်း
တနင်္လာနေ့က ထွက်ပေါ်ခဲ့တဲ့ နည်းပြ လူးဝစ် ဒီလာဖျူအန်တေးရဲ့ ကမ္ဘာ့ဖလား ပြိုင်ပွဲဝင် စပိန် လက်ရွေးစင် အသင်း လူစာရင်းမှာ ရွေးချယ်ခံခဲ့ရတဲ့ ဂိုးသမား ၃ ဦးထဲမှာ ရာယာက တစ်ဦး အပါအဝင် ဖြစ်ခဲ့ပါတယ်။ ဒါပေမယ့်လည်း လာမယ့် ဗိုလ်လုပွဲမှာ ပီအက်စ်ဂျီနဲ့ ရင်ဆိုင်ရချိန်၌ ၂၀၂၂ ခုနှစ် မတ်လက သူ့ကို စပိန် လက်ရွေးစင် အသင်းကြီး အတွက် ပထမဆုံး အကြိမ် ပွဲထွက်ကစားခွင့် ပေးခဲ့တဲ့ နည်းပြဟောင်း လူးဝစ် အန်နရီကေးနဲ့ ပြန်လည်ရင်ဆိုင်ရမှာ ဖြစ်ပါတယ်။
“ကျွန်တော် သူ့ကို ကောင်းကောင်း သိပါတယ်။ သူက ကျွန်တော့်ကို လက်ရွေးစင် အသင်းမှာ ပထမဆုံး ပွဲထွက်ခွင့်ပေးခဲ့တာ ဖြစ်လို့ သူ့အပေါ် အများကြီး လေးစားမှု ရှိပါတယ်။ သူဟာ တကယ့်ကို ထူးချွန်ပြောင်မြောက်တဲ့ နည်းပြ တစ်ဦး ဖြစ်သလို လူကောင်း တစ်ယောက်လည်း ဖြစ်တယ် ဆိုတာ ကျွန်တော်တို့ သိပါတယ်။ သူက ပြိုင်ဘက်တွေ ခက်ခဲအောင် အမြဲတမ်း နည်းဗျူဟာ အပြောင်းအလဲတွေ လုပ်လေ့ရှိပါတယ်။ ဒါပေမယ့် ကျွန်တော်တို့ ဒီတိုက်ပွဲကို အနိုင်ယူပြီး ချန်ပီယံလိဂ် ဗိုလ်လုပွဲမှာ အသာစီးရနိုင်ဖို့ မျှော်လင့်ပါတယ်။ ကျွန်တော်တို့ အသင်းဟာ ပြစ်ဒဏ်ဘော/ ထောင့်ကန်ဘော (Set-pieces) တွေမှာ အားကောင်းတယ်ဆိုတာ သိထားကြပြီး ဗိုလ်လုပွဲ မှာလည်း Set-piece ကနေ တစ်ဆင့် ဂိုးသွင်းယူနိုင်ဖို့ မျှော်လင့်ပါတယ်” လို့ ရာယာက ဖြည့်စွက် ပြောကြားသွားခဲ့ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
