ဖူလ်ဟမ် နည်းပြသစ် အဲလ်ဗာရို အာဘီလိုအာဟာ ဆန်တီယာဂို ဘာနေဗျူးမှာ သူမျက်စိကျခဲ့တဲ့ အကြိုက်ဆုံး တိုက်စစ်မှူးလေးကို ခရေဗင် ကော့တေ့ဂျ်ဆီ ခေါ်ယူဖို့ ပစ်မှတ်ထား ကြိုးပမ်းနေပါတယ်။ သတင်းတွေရဲ့ ဖော်ပြချက်အရ ဂွန်ဇာလို ဂါစီယာဟာ နည်းပြဟောင်း အာဘီလိုအာနဲ့ ပရီးမီးယားလိဂ်မှာ ပြန်လည် လက်တွဲဖို့ အတွက် ဖူလ်ဟမ်နဲ့ ဆွေးနွေးမှုတွေ ပြုလုပ်နေတယ်လို့ သိရပါတယ်။
အသက် ၂၂ နှစ်အရွယ် စပိန် တိုက်စစ်မှူး ဂွန်ဇာလိုဟာ ပြီးခဲ့တဲ့ နွေရာသီ ဖီဖာ ကလပ် ကမ္ဘာ့ဖလား ပြိုင်ပွဲမှာ ခြေစွမ်းပြသပြီး နောက်ပိုင်း ဥရောပ ကလပ်များစွာရဲ့ စိတ်ဝင်စားမှုကို ရရှိခဲ့သူပါ။ ဒါပေမယ့် ရီးရဲလ်မက်ဒရစ် ဘက်က အဲဒီတုန်းက သူ့ကို ရောင်းမထုတ်ခဲ့ဘဲ အန်းဒရစ်ခ် လိုင်ယွန်ဆီ အငှားသွားနေချိန် အမ်ဘာပေးရဲ့ အရန် တိုက်စစ်မှူး အဖြစ် ပထမအသင်းကြီးမှာ ထိန်းသိမ်းထားခဲ့တာ ဖြစ်ပါတယ်။
ဂွန်ဇာလို တိုးတက်လာဖို့ အတွက် ဇာဘီ အလွန်ဆိုနဲ့ အာဘီလိုအာ တို့ရဲ့ မြေတောင်မြှောက်ပေးမှုက အဓိကကျခဲ့တာကြောင့် မက်ဒရစ် ကနေ ထွက်ခွာခဲ့ရင် သူ့အတွက် အသင့်တော်ဆုံး ပန်းတိုင်ဟာ ပရီးမီးယားလိဂ်ပဲ ဖြစ်ပါတယ်။ ချဲလ်ဆီး အသင်းက မော်ဂန် ရော်ဂျာစ်ကို စံချိန်တင် ပြောင်းရွှေ့ကြေးနဲ့ ခေါ်ယူဖို့ နီးစပ်နေချိန်မှာ ဖူလ်ဟမ် ကတော့ ဂွန်ဇာလိုကို ခေါ်ယူဖို့ တိတ်တဆိတ် ထိရောက်စွာ လှုပ်ရှားနေခဲ့တာပါ။
The Athletic ရဲ့ ဖော်ပြချက်အရ အာဘီလိုအာဟာ ရီးရဲလ်မက်ဒရစ် ကက်စတီလာ မှာရော ပထမ အသင်းကြီးမှာပါ သူကိုယ်တိုင် လေ့ကျင့်သင်ကြားပေးခဲ့တဲ့ တိုက်စစ်မှူးလေးကို ရအောင် ခေါ်ဖို့ အသေအချာ ကြိုးပမ်းနေတယ်လို့ ဆိုပါတယ်။ လက်ရှိမှာ ဂွန်ဇာလိုနဲ့ ဖူလ်ဟမ်တို့ အကြား ဆွေးနွေးမှုတွေ တိုးတက်နေပြီး အဆုံးသတ် ဆုံးဖြတ်ချက် ကတော့ ကစားသမားပေါ်မှာပဲ မူတည်နေပါတယ်။
ရီးရဲလ်မက်ဒရစ် နည်းပြသစ် ဟိုဆေး မော်ရင်ညိုက ဂွန်ဇာလိုရဲ့ ခြေစွမ်းကို သဘောကျပေမယ့် လာမယ့်ရာသီမှာ ပုံမှန် ပွဲထွက်ခွင့်နေရာ မာမာထန်ထန် အာမမခံနိုင်တာကြောင့် ဒါဟာ ကစားသမားကို ဖူလ်ဟမ်ဆီ တွန်းပို့ပေးလိုက်သလို ဖြစ်သွားစေခဲ့ပါတယ်။
ဂွန်ဇာလိုနဲ့ အတူ ဖူလ်ဟမ်ဆီ ပါလာနိုင်တဲ့ နောက်ထပ် ရီးရဲလ် ကြယ်ပွင့်
အာဘီလိုအာရဲ့ အားစိုက်ထုတ်မှုတွေက ဂွန်ဇာလိုဟာ သူ့ရဲ့ ထိပ်တန်း ပစ်မှတ် ဆိုတာ ပေါ်လွင်စေပါတယ်။ ၂၀၂၃-၂၄ ရာသီတုန်းက ကက်စတီလာမှာ ၂၅ ဂိုး အထိ သွင်းယူကာ စံချိန်တင်ခဲ့ပြီးနောက် ပထမအသင်းကြီးဆီ ရောက်လာခဲ့တဲ့ ဂွန်ဇာလိုဟာ ပွဲပေါင်း ၅၁ ပွဲမှာ ၁၃ ဂိုး သွင်းယူပေးထားတာပါ။
ဒါပေမယ့် ဂွန်ဇာလိုဟာ အာဘီလိုအာ လန်ဒန် အနောက်ပိုင်းဆီ ခေါ်ဆောင်သွားမယ့် တစ်ဦးတည်းသော ရီးရဲလ် ကစားသမား မဟုတ်သေးပါဘူး။ သတင်းတွေ အရ အာဂျင်တီးနား တောင်ပံ ကစားသမား ဖရန်ကို မာစတန်တူအိုနို ကိုလည်း ဖူလ်ဟမ်က မျက်စိကျနေပါတယ်။ မက်စတန်တူအိုနိုဟာ ပြီးခဲ့တဲ့ နွေရာသီက မက်ဒရစ်ဆီ ရောက်ရှိလာခဲ့ပေမယ့် နေရာရဖို့ ရုန်းကန်ခဲ့ရပြီး ၃၅ ပွဲမှာ ၃ ဂိုးပဲ သွင်းယူနိုင်ခဲ့သူပါ။
ဂိုးပြတ် နိုင်နေတဲ့ ပွဲတွေမှာတောင် မိနစ် အနည်းငယ်လောက်ပဲ ဝင်ကစားရပြီး အရန်ခုံမှာ အချိန်ဖြုန်းနေတာထက် စာရင် တောင်ပံ ကစားသမားလေး တိုးတက်လာဖို့ အတွက် အငှားချလိုက်တာက အကောင်းဆုံး နည်းလမ်း ဖြစ်တယ်လို့ အများက ယူဆနေကြပါတယ်။ ဂွန်ဇာလိုသာ အရင်ရောက်နှင့်နေရင် မက်စတန်တူအိုနို အတွက်လည်း နည်းပြဟောင်း အာဘီလိုအာနဲ့ ပြန်လည် လက်တွဲဖို့ ပိုမိုလွယ်ကူသွားမှာပါ။ ဖူလ်ဟမ် ဘက်ကလည်း တိုက်စစ်မှူး ရာအူးလ် ဟင်မီနက်ဇ် ထွက်ခွာသွားခဲ့တာကြောင့် တိုက်စစ် အင်အား ထပ်မံဖြည့်တင်းဖို့ လိုအပ်နေပါတယ်။
ဂွန်ဇာလို ထွက်ခွာမှုက ရီးရဲလ်မက်ဒရစ် အပေါ် ဘယ်လို သက်ရောက်မလဲ
ဂွန်ဇာလိုကို ဖူလ်ဟမ်ဆီ လက်လွှတ်လိုက်ရတာဟာ ရီးရဲလ်မက်ဒရစ် အတွက် ကြီးမားတဲ့ ထိခိုက်မှုတော့ ဖြစ်မလာနိုင်ပါဘူး။ သူဟာ ဂိုးသွင်း စွမ်းရည် ထက်မြက်တဲ့ နံပါတ် ၉ တိုက်စစ်မှူးစစ်စစ် ဖြစ်ပေမယ့် လက်ရှိ မှာတော့ အမ်ဘာပေးနဲ့ အင်းဒရစ်ခ် တို့ရဲ့ နောက် တတိယ ဦးစားပေး နေရာမှာပဲ ရှိနေတာပါ။
လိုင်ယွန်မှာ အငှားသွားကစားစဉ် ၂၁ ပွဲမှာ ၈ ဂိုးသွင်း၊ ၈ ကြိမ် ဂိုးဖန်တီးပြီး ၂၀၂၆ ကမ္ဘာ့ဖလား ဘရာဇီးလ် လူစာရင်းမှာ ပါဝင်နိုင်ခဲ့တဲ့ အင်းဒရစ်ခ်ဟာ လာမယ့်ရာသီမှာ အမှတ်သင်္ကေတ ဖြစ်တဲ့ ကျောနံပါတ် ၉ ဂျာဆီကို ပြန်လည် ဝတ်ဆင်ရဖို့ မျှော်လင့်ရပြီး အသင်းတွင်း နေရာ အခိုင်အမာ ရရှိထားတာပါ။ ပိုမိုရင့်ကျက်လာတဲ့ အန်းဒရစ်ခ် တစ်ယောက် ဘာနေဗျူးမှာ နေရာယူလာတော့မှာမို့ ဂွန်ဇာလို အတွက် ပွဲထွက်ခွင့်က ပိုမိုကျဉ်းမြောင်းသွားခဲ့ပါပြီ။ ဒါကြောင့် မော်ရင်ညိုရဲ့ လူစာရင်းမှာ အပိုဖြစ်နေမယ့် အစား ပရီးမီးယားလိဂ်မှာ သွားရောက် ခြေစွမ်းပြတာက ပိုကောင်းမှာပါ။ သတင်းတွေအရ ဆိုရင် ရီးရဲလ် အနေနဲ့ စာချုပ်ထဲမှာ ပြန်လည် ဝယ်ယူခွင့်နဲ့ ပြန်လည် ရောင်းချကြေး ရာခိုင်နှုန်း ထည့်သွင်းချုပ်ဆိုသွားမှာ ဖြစ်ပါတယ်။
ဒါ့အပြင် ဥရောပ ချန်ပီယံ ၁၅ ကြိမ်ရ ရီးရဲလ်မက်ဒရစ် အသင်းဟာ ကွင်းလယ်နဲ့ ဗဟိုခံစစ်နေရာတွေ အတွက် ကစားသမားသစ် ထပ်မံ ရှာဖွေနေတာကြောင့် ဂွန်ဇာလိုကို ရောင်းချရမယ့် ပြောင်းရွှေ့ကြေး ကိုလည်း ဝမ်းမြောက်စွာ ကြိုဆိုသွားမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
